Jan 5, 2012

புத்தகக் கண்காட்சி


நேற்று உ பதிப்பகத்தின் புத்தக வெளியீட்டு விழாவிற்கு வந்து, விழாவினை நல்ல படியாக நடத்திக் கொடுத்த அனைத்து நல்ல உள்ளங்களுக்கும் எனது இதயம் கனிந்த நன்றி.









இன்று முதல் சென்னை புத்தகக் கண்காட்சியில் டிஸ்கவரி புக் பேலஸ் அரங்கில் எங்களது புத்தகங்கள் விற்பனைக்கு கிடைக்கும்:

ஸ்டால் எண்: 334
தொடர்பு எண்: 0091 9940446650

இணையத்தின் வழியாகவும் எங்களது புத்தகங்களை வாங்கலாம். மேல் விபரங்களுக்கு மேலே குறிப்பிட்ட தொலை பேசி எண் மூலம் நண்பர் வேடியப்பனைத் தொடர்புகொள்ளலாம்.


Jan 4, 2012

அன்பு நண்பர்களுக்கு!


எங்கள் பதிப்பகத்தின் மூன்று புத்தகங்களின் வெளியீட்டு விழாவிற்கு உங்களை வருக வருக என வரவேற்கிறோம். 





இடம் : டிஸ்கவரி புக் பேலஸ்

நாள் : 04/01/12

நேரம் : மாலை 6 மணி

விலாசம்: 6, முனுசாமி சாலை, கே.கே.நகர்

வெளியிடப்படும் புத்தகங்கள்:

01. சங்கர் நாராயண்: தெர்மக்கோல் தேவதைகள் (சிறுகதை தொகுப்பு)

02. யுவகிருஷ்ணா: அழிக்கப்பிறந்தவன் (நாவல்)

03. என். உலகநாதன்: நான் கெட்டவன் (இரண்டு குறுநாவல்களும், பத்து சிறுகதைகளும்)

சிறப்பு அழைப்பாளர்கள் :

இயக்குனர் மீரா கதிரவன்

இயக்குனர் கே.பிபி நவீன்

இயக்குனர் தனபாலன்

இயக்குனர் ஹரீஷ்

மற்றும் பிரபல எழுத்தாளர்கள் , கவிஞர்கள், பதிவர்கள், வாசக அன்பர்கள் என்று அனைவரும் வந்திருந்து விழாவினை சிறப்பிக்க உள்ளார்கள்.

எங்கள் பதிப்பகமான “உ” பதிப்பகம் இந்த மூன்று புத்தக வெளியீட்டின் மூலமாய்  பதிப்பகத்துறையில் தன் காலடியை எடுத்து வைக்கிறது.  உங்களின் ஆதரவை வேண்டுகிறோம்.

பதிவர்கள் நண்பர்கள் அனைவரும் வந்து விழாவினை சிறப்பாக நடத்திக்கொடுக்குமாறு மிகவும் தாழ்மையுடன் கேட்டுக்கொள்கிறேன்.

நன்றி.



Jan 3, 2012

மிக்ஸர் - 03.01.2012


புத்தகங்கள் வெளியீட்டு விழா:

தேதி : 04.01.2012

நேரம்: மாலை 6 மணி

இடம்: டிஸ்கவரி புக் பேலஸ்

வெளியீடு காணும் புத்தகங்கள்: 1. “தெர்மக்கோல் தேவதைகள்” - கேபிள் சங்கர்
                                                        2. "அழிக்கப் பிறந்தவன்" - யுவகிருஷ்ணா
                                                        2. "நான் கெட்டவன்" - என்.உலகநாதன்

வெளியீடு: "உ" பதிப்பகம்

வழக்கம் போல் நண்பர்கள் அனைவரும் விழாவில் கலந்து கொண்டு சிறப்பிக்க வேண்டும் என்று "உ" பதிப்பகம் சார்பாக மிகவும் தாழ்மையுடன் கேட்டுக்கொள்கிறேன்.

விழாவைப் பற்றிய தகவல்களுக்கு நண்பர் கேபிள் சங்கரை அணுகவும்.

************************************************

சிறு வயதில் கனவு கண்டால் மிகவும் பயப்படுவேன். காரணம் என்னவென்றால், பெரும்பாலான கனவுகள் பலித்திருக்கின்றன. உறவினர் ஒருவர் அவர் கனவில் எருமை மாடு வந்ததாக கூறினார்.  அப்படி வந்தால் 'நாம் இறக்கப் போகிறோம்' என்று அர்த்தம் என்று சொன்னார். அவர் சொன்னபடியே சில மாதங்களில் இறந்தும் போனார். அதனால் பல இரவுகள் தூங்கப் போகும் முன் 'கனவில் எருமை மாடு வரக்கூடாது' என்று வேண்டிக்கொண்டே தூங்கி இருக்கிறேன். ஓரளவு பெரியவன் ஆனவுடன் தான் அதிலிருந்து விடுபட்டேன். பின் கனவுகளைப் பற்றி நிறைய படித்து தெரிந்து கொண்டேன். அதனால் பிரச்சனை இல்லாமல் இருந்தேன். ஆனால் இப்போது மீண்டும் அதே கனவுப் பிரச்சனை. கடந்த சில நாட்களாக அதிகாலையில் மோசமான கனவுகள் வருகின்றன். திடுக்கிட்டு எழுந்துவிடுகிறேன். அதன் பிறகு என் தூக்கம் போய்விடுகிறது. 

அதனால் கனவில் கண்டபடி நடந்துவிடுமோ? என்று பயமாக உள்ளது. சில கனவுகள் அப்படியே நடக்கக் கூடாதா? என்று ஆசையாகவும் இருக்கிறது.

************************************************

பாலகுமாரன் எழுதிய "தாயுமானவன்" நாவலை பல முறை படித்திருக்கிறேன். சில நாட்களுக்கு முன் மீண்டும் மீள் வாசிப்பு செய்தேன். இந்த நாவல் படிக்கும் போது எல்லாம் நான் வேறு உலகில் சஞ்சரிக்க ஆரம்பித்துவிடுகிறேன். கல்யாணத்திற்கு முன் இந்த நாவலை படித்ததற்கும், தற்போது படிப்பதற்கும் நிறைய வித்தியாசங்களை உணர்கிறேன். ஒரு கணவன் மனைவி எப்படி வாழ வேண்டும் என்று இந்த நாவலை படித்தால் அறிந்து கொள்ளலாம். என்னைப் பொருத்தவரை பெண்களை மிகவும் உயர்வாக எழுதிய ஒரே எழுத்தாளர் பாலகுமாரன்தான். இதுவரை படிக்காதவர்கள், வாய்ப்பு கிடைத்தால் இந்த நாவலை உடனே வாங்கி படித்துவிடுங்கள்.  அதிலும் சேப்டர் 22லிருந்து 25 வரை படிக்கும் போது வேறு எதைப் பற்றியும் நினைக்காதீர்கள். அப்போதுதான் உங்களால் அதன் உள்ளே செல்ல முடியும். நான் இந்த சேப்டர்களை மட்டும் பல முறை படித்திருக்கிறேன். ஒவ்வொரு முறையும் ஒவ்வொரு உணர்வுகள். நிறைய சமயங்களில் அழுதிருக்கிறேன். ஆனால், அது ஆனந்த கண்ணீர். மனைவியின் அருமையை அறிய அனைவரும் படிக்க வேண்டிய நாவல்.

************************************************

என் நண்பரிடம் இந்தப் புத்தக கண்காட்சியில் எனக்காக வாங்க சொன்ன புத்தகங்கள்:

01. இது ராஜபாட்டை அல்ல - நடிகர் சிவக்குமார்
02. மாதொரு பாகன் - பெருமாள் முருகன்
03. கரையாத நிழல்கள் - அசோகமித்ரன்
04. அம்மா வந்தாள் - தி ஜானகிராமன்
05. மரப்பசு - தி ஜானகிராமன்
06. மோகமுள் - தி ஜானகிராமன்
07. மெளனமே காதலாக - பாலகுமாரன்
08. திருப்பூந்துருத்தி- பாலகுமாரன் 
09. பயணிகள் கவனிக்கவும்- பாலகுமாரன் 
10. இரும்பு குதிரைகள்- பாலகுமாரன் 
11. மெர்குரி பூக்கள்- பாலகுமாரன் 
12. முன்கதை சுருக்கம் - பாலகுமாரன்
13. தலையணை பூக்கள் - பாலகுமாரன்
14. கள்ளி - வாமு கோமு 
15. சாந்தாமணியும் இன்ன பிற காதல் கதைகளும் - வாமு கோமு 
16. ஆதவனின் கதைகள் 
17. வெட்டுப் புலி
18. ஆண்பால் பெண்பால்
19. பசித்த பொழுது - மனுஷ்ய புத்திரன்
20. கல்யாண்ஜி கவிதைகள்
21. முடியலத்துவம்- செல்வேந்திரன்
21. கோணல் பக்கங்கள் - சாரு நிவேதிதா
22. கற்றதும் பெற்றதும் - சுஜாதா
23. பதிவர்களின் அனைத்து புத்தகங்களும்

சுஜாதாவின் ஏறக்குறைய அனைத்து புத்தகங்களும் என்னிடம் இருப்பதால், இந்த லிஸ்டில் ஒரு புத்தகம் மட்டுமே இடம் பெறுகிறது. நண்பர்கள் வேறு என்னென்ன புத்தகங்கள் வாங்கலாம் என்று பரிந்துரைக்கவும்.

************************************************

அஷ்டமி, நவமி நாட்களில் எந்த நல்ல காரியங்களையும் செய்யக் கூடாது என்று சொல்கிறார்களே? அது ஏன்? என்னக் காரணம்? நான் முதலில் இதை எல்லாம் நம்பாமல்தான் இருந்தேன். ஆனால், சில சந்தர்ப்பங்களில் நான் வீட்டில் சொன்னதை கேட்காமல் நான் ஆரம்பித்த அல்லது செய்த எந்த செயலுமே அதன் குறிக்கோளை அடையவில்லை.

ஒரு முறை அஷ்டமி அன்று ஏர்போர்ட் சென்றோம். ஆனால், விமானத்தை தவறவிட்டோம். இன்னொரு முறை அஷடமி அன்று செல்ல வேண்டிய இடத்திற்கு மூன்று மணி நேரம் தாமதமாக சென்றேன். 

இன்னொரு முறை அஷ்டமி அன்று ஆரம்பித்த ஒரு செயல் மிகப் பெரிய பிரச்சனையில் கொண்டு விட்டது.

அமெரிக்காவிலோ அல்லது ஐரோப்பாவிலோ யாரும் அஷ்டமி, நவமி பார்ப்பதில்லை. அஷ்டமி நவமி அன்று விமானம் பறக்காமலா இருக்கிறது.

எனக்கு நம்பிக்கை இருக்கிறதோ இல்லையோ, குடும்பத்தினருக்காக அவர்கள் சொல்படி நடக்க வேண்டி இருக்கிறது.

விசயம் தெரிந்தவர்கள் இதில் உள்ள உண்மையை தயவு செய்து விளக்குங்களேன்.

************************************************


Jan 2, 2012

கல்கியில் என் சிறுகதை


இந்த புத்தாண்டு இப்படி ஒரு சந்தோசத்துடன் ஆரம்பமாகும் என்று நான் கனவிலும் நினைக்கவில்லை. நேற்று வெளிவந்த 08.01.2012 தேதியிட்ட கல்கியில் நான் சமீபத்தில் எழுதிய சிறுகதையான  "அஞ்சனா" என்ற கதை வெளியாகி உள்ளது. போனில் மூலமும், மின்னஞ்சல் மூலமும் வாழ்த்துகள் சொன்ன அனைவருக்கும் என் நெஞ்சார்ந்த நன்றி.





சென்ற மாதத்தில் ஒரு நாள் நண்பர் ஒருவருடம் பேசிக்கொண்டிருக்கையில் அவர் சொன்ன ஒரு விசயம் என்னை சிந்திக்க வைத்தது. ஒரே மாதிரி கதைகளை எழுதாமல், பல விசயங்களை கதைகளில் எழுத என்னைத் தூண்டினார். அதனால், ஒரு புதுவிதமான பார்மெட்டில் இந்த கதையினை எழுத ஆரம்பித்தேன்.

கதை சொல்லும் முறை பல இருந்தாலும், எனக்கென்னமோ நானே கதையை சொல்வது போல் எழுதுவது வசதியாக இருக்கிறது. இருந்தாலும் வேறு வகையான கதை சொல்லும் முறையையும் எழுத பழக வேண்டும். அவ்வாறான கதைகள் ஏற்கனவே நிறைய எழுதி இருந்தாலும், இன்னும் வேறு விதமான முயற்சிகளில் எழுத ஆசைப்படுகிறேன்.

நண்பர்கள் அவசியம் கல்கி இதழில் வெளியான எனது கதையை படித்து அதில் உள்ள நிறை குறைகளை சொன்னால், மேலும் என்னை செம்மை படுத்திக்கொள்ள ஏதுவாக இருக்கும்.

எனக்கு எல்லாமே தாமதமாகத்தான் கிடைக்கும். ஆனால் நல்லவையாக அமையும் என்று ஏற்கனவே நிறைய முறை சொல்லி இருக்கிறேன். அது போலத்தான் நேற்றும். கதை வந்துவிட்டது. நண்பர்கள் போன் செய்து வாழ்த்துகிறார்கள். ஆனால் என்னால் கதையை கல்கியில் படிக்க முடியவில்லை. சென்ற முறை கதை வெளியான அன்று கோலாலம்பூரில் மீட்டிங் இருந்ததால் என்னால் உடனே கல்கி வாங்க முடிந்தது.

இந்த முறை எந்த மீட்டிங்கும் அமையவில்லை. அதுவும் இல்லாமல் பொதுவிடுமுறை வேறு. ரொம்பவும் சங்கடமாக உணர்ந்த போது என் பெண் கூறினாள், "ஏன் டாடி ஆன்லைன்ல சப்ஸ்கிரிப்ஷன் பண்ணி படிங்களேன்" அடுத்த விநாடியே ரூபாய் 900 சந்தா கட்டி உறுப்பினராக இணந்து விட்டேன். என் கதையை படித்தும் விட்டேன்.

ஆனாலும், புத்தகத்தை கையில் வாங்கி படிக்கும் அந்த சுகம் கிடைக்கவில்லை. இந்த மாதம் ஊருக்கு போகும் போது வாங்கி படிக்க வேண்டியதுதான்.

என் கதையை வெளியிட்ட கல்கி நிறுவனத்திற்கும், , கல்கியின் உதவி ஆசிரியர் எழுத்தாளர் அமிர்தம் சூர்யா அவர்களுக்கும் என் நன்றியினை தெரிவித்துக்கொள்கிறேன்.


Jan 1, 2012

கற்றதும், பெற்றதும்!



இனிய நண்பர்களுக்கு என் இதயம் கனிந்த புத்தாண்டு நல்வாழ்த்துகள்!

2011:

'சென்ற வருடத்தில் நான்' என்று நேற்றே எழுத நினைத்தேன். ஆனால் பல வேலைகள் காரணமாக என்னால் எழுத முடியவில்லை. சென்ற வருடத்தில் நிறைய நல்ல விசயங்கள் என் வாழ்வில் நடந்திருப்பதாகவே நினைக்கிறேன்.

அலுவலகம்: நான் மிகவும் சந்தோசம் அடைந்த நாள் ஜீன் மாதம் 1 ஆம் தேதி. ஏனென்றால், அன்றைய தேதியில் இருந்துதான் கம்பனியின் இயக்குநராக பொறுப்பேற்றேன். அந்த உயர்வு என் வாழ்நாள் சாதனையாகவே நான் கருதுகிறேன். நான் எப்போதுமே மிகுந்த தன்னம்பிக்கையுடன் வாழ்வதால்தான் இது சாத்தியமாயிற்று என்று நினைக்கிறேன். மூன்று வருடங்களுக்கு முன்பே நான் என் மனைவியிடம் "நான் ஒரு நாள் இந்தக் கம்பனியின் இயக்குநர் ஆவேன்" என்று கூறியிருந்தேன். அப்போது அனைவரும் சிரிக்கவே செய்தார்கள். என்னைப் பொருத்தவரை நான் எப்போதுமே அதிகம் கனவு காண்பேன். அந்தக் கனவை நினைவாக்க மிகுந்த பாடுபடுவேன். கடைசியில் அதை அடையவும் செய்வேன்.

ஆனால் ஒரே ஒரு விசயத்தையும் இங்கே குறிப்பிட வேண்டும்.  இயக்குநர் ஆன பிறகு வாழ்க்கையின் நிம்மதியை தொலைத்துவிட்டேன். 24 மணி நேரமும் அலுவலகம் சார்ந்த பிரச்சனையிலேயே வாழ வேண்டி இருக்கிறது. இருந்தாலும் இதை ஒரு சுகமான சுமையாகவே எடுத்துக்கொண்டேன். பணம் மட்டுமே வாழ்க்கை அல்ல என்பதை உணர்ந்த ஆண்டு 2010.

தனிப்பட்ட வகையில் எல்லா வருடங்கள் போலவே சென்ற வருடமும் உடல் நிலையில் அதிக கவனம் செலுத்தினேன். தொடர்ந்து வாக்கிங், ஜிம் சென்றேன். எந்த நோயும் அண்டாமல் பார்த்துக்கொண்டேன். குடும்பத்தினருடன் அதிக நேரம் செலவு செய்தேன். இரண்டு முறை ஊருக்குச் சென்று வந்தேன். குடும்பத்துடன் தாய்லாந்துக்கு விடுமுறையை கழிக்கச் சென்றேன். சந்தோசமான நாட்கள் அவை.

ஜனவரியில் புதிய வீடுகள் கட்ட வாஸ்து பூஜை செய்தோம். யாரிடமும் கேட்காமல் மிகப்பெரிய தொகை பேங்கில் கடனாக வாங்கினேன். என்னுடைய வைப்புத் தொகைக்கு கொடுக்கும் வட்டியைவிட, கடனுக்கு அதிக வட்டி வாங்குகிறார்கள். ஜனவரியில் பாதிக்கடனையாவது அடைக்கலாமா? என்று யோசித்துக்கொண்டிருக்கிறேன். அப்பா வாடகை கொடுக்க முடியாமல் கஷ்டப்பட்ட போது நாமும் நிறைய வீடு கட்ட வேண்டும் என்று நினைத்தேன். இதோ, அந்த ஆசை பூர்த்தியாகிவிட்டது. குறைந்த வாடகையில் நான்கு குடும்பங்களுக்கு வாடகைக்கு வீடுகளை தரப் போகிறேன்.

இந்த வருடத்தில் SBI Unit Linked Planல் போட்டிருந்த பணத்தை மீட்டு எடுத்தேன். போட்ட பணம் டபுள் ஆகும் என்றார்கள். ஆனால், வட்டியும் இல்லாமல், போட்ட பணமே கிடைக்கவில்லை. கிட்டத்தட்ட ரூபாய் 150,000 நஷ்டம் ஏற்பட்டது. இனி, இது போன்ற Mutual Fundல் பணத்தை முதலீடு செய்யக்கூடாது என்ற பாடத்தை கற்றுக்கொண்டேன். நிறைய நண்பர்களுக்கு பண உதவி செய்தேன்.

பதிவுலகம்: அதிகம் எழுதவில்லை என்றாலும், நானும் இந்த இடுகையையும் சேர்த்து 342 இடுகைகள் எழுதிவிட்டேன். ஒரு மீள்பதிவும் போட்டது கிடையாது. மார்ச்சில் "ழ" பதிப்பகம் மூலமாக என்னுடைய இரண்டு புத்தகங்கள் வெளியாகின. அதன் மூலம் நிறைய பாடங்கள் கற்றுக்கொண்டேன். 2010ல் நிறைய கதைகள் எழுதினேன். கல்கியில் என் கதை "அமுதா" பிரசுரமானது. இன்னும் நிறைய எழுதிக்கொண்டிருக்கிறேன். ஒரு ஆசையில் நண்பர்களுடன் "உ" பதிப்பகம் ஆரம்பித்தேன். அதன் மூலம் என்னுடைய "நான் கெட்டவன்" உட்பட மூன்று புத்தகங்கள் வெளியாகின்றன.

வலைப்பூவின் மூலம் நிறைய நண்பர்களைப் பெற்றேன். ஃபேஸ் புக்கிலும், டிவிட்டரிலும் அவ்வப்போது மட்டுமே வந்து சென்றேன். இன்னும் இவைகளை எப்படி உபயோகிப்பது என்ற சூட்சுமம் தெரியவில்லை.

2012:

நான் எப்போதும் போலவே வாழ விரும்புகிறேன். புது வருடத்திற்காக என்று எந்த ஒரு சபதமும் எடுத்துக்கொள்ளவில்லை. எப்போதும் போல தினமும் உடற்பயிற்சி செய்து நல்ல உடல் நலத்துடன் எந்தவிதமான கெட்டப் பழக்கங்களுக்கும் அடிமையாகாமல், எந்த வம்பு தும்பிலும் ஈடுபடாமல் வாழ்வேன் என்று நம்புகிறேன்.

நண்பர்களுக்கு மீண்டும் என் இதயம் கனிந்த புத்தாண்டு வாழ்த்துகள்!

பின் குறிப்பு: என்ன இது? ஒரே சந்தோசமான விசயங்களையும், தற்பெருமை குறித்தான இடுகையா இருக்கே? அப்போ நீங்க 2010ல எந்தப் பிரச்சனைகளையும் சந்திக்களையா? என கேட்கும் நண்பர்களுக்கு... பிரச்சனைகள் இல்லாத வாழ்க்கை உண்டா? சோகங்கள் இல்லாத வாழ்க்கை உண்டா? ஒரு மனிதன் எப்போதுமே சந்தோசமாக இருக்கும் சாத்தியம் உண்டா? இல்லைதானே? அதே போல்தான் என் வாழ்வும். நானும் நிறைய பிரச்சனைகளை சந்தித்தேன். நிறைய மனக் கஷ்டங்களை சுமந்தேன். அதையெல்லாம் ஏன் இப்போ சொல்ல வேண்டும்?

அதற்கு பதில் சந்தோசத்தை மட்டும் பகிர்ந்து, அந்த சந்தோசத்தின் அதிர்வை நண்பர்களுக்கும் அளிக்கலாம் அல்லவா? அதனால்தான் நல்ல விசயங்களை மட்டுமே பகிர்ந்து கொண்டேன்.

சென்ற வருடம் நான் எழுதிய இடுகை: