May 24, 2010

ஒரு இனிமையான பயணம் - 5

எங்கள் டிக்கட்டில் உள்ள 4D சினிமா காட்சி இரவு 10.45க்குத்தான். ஆனால், அதுவரை என்ன செய்வது? அதனால் அந்த தியேட்டர் டிக்கட் கலக்டரிடம் சென்று 10.00 மணி காட்சிக்கு டிக்கட்டை மாற்றிக்கொள்ளலாமா? என்றேன். அவர், "முடியாது. தியேட்டர் புல் ஆகிவிட்டது. 10.15 ஷோக்கு முடியுமா என்று பார்க்கிறேன்" என்றார். ஆனால் சிலர் 10. மணி காட்சிக்கே டிக்கட் கவுண்டரில் வாங்கவே, அவரிடம் மீண்டும் சென்று, " 10 மணி காட்சிக்கு டிக்கட் இருக்கிறதே? அவர்கள் எல்லாம் வாங்குகின்றார்களே?" என்றேன். அது எவ்வளவு பெரிய தவறு என்பதை சிறிது நேரத்தில் உணர்ந்தேன். அவர், "சிறிது நேரம் காத்திருங்கள் சொல்கிறேன்" என்றார். பிறகு "இடம் இருக்கிறது வாருங்கள்" என்று கூப்பிட்டார்.

நாங்கள் தியேட்டரில் சென்று அமர்ந்தோம். அதுவரை 4D சினிமா என்றால் என்ன என்று எனக்குத்தெரியாது. 3D சினிமா கேள்விபட்டுள்ளேன். ஆனால் பார்த்தது இல்லை. சரியாக படம் 10 மணிக்கு ஆரம்பித்தது. எல்லோருக்கும் ஒரு கண்ணாடி கொடுத்து இருந்தார்கள். படத்தின் முதல் காட்சியிலேயே கம்ப்யூட்டர் கீ போர்ட், பேனா முகம் அருகே பறக்க ஆரம்பித்தது. சிறிது நேரத்தில் கால்களை யாரோ பிடித்து ஆட்டுவது போல் இருந்தது. படத்தில் ஒரு பேய் வந்தது. அதே நேரம் இருக்கைகள் எல்லாம் பயங்கரமாக ஆட ஆரம்பித்தது. பின்னாலிருந்து யாரோ முதுகை பிசைவது போல் ஒரு உணர்வு ஏற்பட்டது. சிறிது நேரத்தில் என் பெண், "டாடி, பயமா இருக்கு. வாங்க போகலாம்" என அழ ஆரம்பித்துவிட்டாள். பையன் என்ன செய்கிறான் என பார்த்தேன். கண்களை இருக்கி மூடிக்கொண்டு பயந்து கொண்டு சீட்டின் நுனியில் உட்கார்ந்து இருந்தான். இனி, அவர்களை படம் பார்க்கச்சொல்லி கட்டாயப்படுத்துவதில் நியாயம் இல்லை என நினைத்து அவர்களை கூட்டிக்கொண்டு வெளியே வந்துவிட்டேன். என் மனைவி வரும் வரையில் நாங்கள் வெளியே உட்கார்ந்து இருந்தோம்.

பின்புதான் தெரிந்தது, நாங்கள் வாங்கியிருந்த 10.45 காட்சியும், அவர் மாற்றித்தருகிறேன் என்று சொன்ன 10.15 காட்சியும் மீன் சம்பந்தப்பட்ட சினிமா என்று. ஒழுங்காக அது போயிருக்கலாம். அந்த சினிமாவில் 4D எபக்ட் இருந்தாலும், பயம் இல்லாமல் பார்த்து இருப்பார்கள் குழந்தைகள். பின்பு பிள்ளைகளின் பயத்தை போக்குவதற்காக வெளியே சின்ன சின்ன ரைடுகளில் விளையாட வைத்து, ரூமுக்கு வந்து சேர இரவு 11 மணி ஆனது.

அடுத்த நாள் காலை எழுந்து, ஹோட்டலில் கொடுத்த காலை உணவை முடித்துக்கொண்டு WaterWorld சென்றோம். செல்லும் வழியில் என் பெண் குதிரை சவாரி செய்ய வேண்டும் என்றாள். தேடிக்கண்டுபிடித்து அங்கே சென்று, டிக்கட் வாங்கி குதிரையில் ஏறினாள். மூன்று ரவுண்ட் என்று சொல்லி அதிகம் பணம் வாங்கினார்கள். நான் கூட ஏதோ அதிக தூரம் அழைத்துச்செல்வார்கள் என்று எண்ணினேன். பிறகுதான் தெரிந்தது, மிக சிறியதூரம் மட்டுமே குதிரையில் அழைத்துச் செல்கிறார்கள். நின்ற இடத்திலேயே மூன்று ரவுண்ட்.



WaterWorldலும் சாப்பாட்டு டோக்கனும் டிக்கட்டுடன் சேர்த்தே கொடுக்கிறார்கள். அங்கே சென்று அனைவரும் உடை மாற்றி, ஒரு லாக்கர் வாடைக்கு வாங்கி துணிகளை எல்லாம் அதில் வைத்துவிட்டு உள்ளே சென்றோம். முதலில் சிறுவர் பகுதிக்கு சென்று பிள்ளைகளை விளையாட வைத்துவிட்டு பெரியவர்கள் பகுதிக்கு சென்றோம். ஏற்கனவே Sunway Lagoon Resortல் ரிஸ்க்கான Water Ride விளையாடி இருந்த அனுபவம் இருந்தாலும், கொஞ்சம் பயந்து கொண்டே தான் அந்த பகுதிக்கு சென்றேன். Family Ride க்கு மனைவி வர மறுக்கவே நானும் நண்பர் ஒருவரும் இருவர் உட்காரும் ஒரு டுயூப் வாங்கிக்கொண்டு உச்சி பகுதிக்கு சென்றோம். உச்சியிலிருந்து கீழே பார்க்கையில் என்னை அறியாமல் சிறிது பயமும், இதய துடிப்பு வேகமாகவும் அடிக்க ஆரம்பித்து விட்டது.




ஒருவிதமான தைரியத்தை வரவழைத்துக்கொண்டு மேலே சென்று அமர்ந்தோம். அங்கே நின்ற ஒரு சீன நண்பர் எங்கள் ட்யுபை தள்ளி விட்டார். பிறகுதான் தெரிந்தது எவ்வளவு ரிஸ்க்கான விளையாட்டு அது என்பது. அந்தரங்கத்தில் பரப்பதுபோல் இருந்தது. அங்கே இங்கே வேகமாக சென்றது. கத்தி தீர்த்துவிட்டேன். அதெல்லாம் விட கொடுமை கீழே வந்து சேர்கையில் தலை குப்புற விழுந்து, ட்யூபில் இருந்து கீழே விழுந்து தண்ணீருக்குள் சென்று தண்ணீரை குடித்து, கத்தி, என் நண்பர் வந்து என் கையை பிடித்து அழைத்துச் சென்றார். நான் ஏன் நீச்சல் கற்றுக்கொள்ளவில்லை என்று அன்றுதான் மிகவும் வருந்தினேன். கீழே வந்து என்னை ஆசுவாசப்படுத்திக்கொள்ள நிறைய நிமிடங்கள் ஆனது.

ஆனால் ஒரு சில காட்சிகளை பற்றி எழுத இங்கே மிகவும் சங்கடமாக உள்ளது. நம் ஊரிலும் இதுபோல இருக்கலாம். ஆனால், அங்கே எல்லாம் காணக்கிடைக்காத காட்சிகளை இங்கே நீங்கள் தாராளமாக மிக தாராளமாக காணாலாம். எல்லோருமே ரொம்ப டேக் இட் ஈஸியாக இருக்கிறார்கள். எல்லாவற்றையும் மிக அருகிலேயே பார்க்கலாம். அப்படியே பார்த்தாலும் யாரும் கண்டு கொள்வதில்லை. ஆடைகள் அணிவதே தேவையில்லை என்ற அளவில் அவர்களின் ஆடைகள். பள்ளி நாட்களிலும், கல்லூரி நாட்களிலும் பார்க்க முடியாதா? எப்படி இருக்கும்? என்று ஏங்கிய அனைத்தையும் மிகவும் சாதாரணமாக பார்க்கலாம். அதுவும் தண்ணீரில்.... மீதியை உங்கள் கற்பனைக்கே விட்டு விடுகிறேன்.

அங்கே ஒரு இடத்தில் செயற்கையான அலையினை ஏற்படுத்துகிறார்கள். அதில் டுயூபுடன் சென்று அமர்ந்தால் மிகவும் சுகமாக உள்ளது. அப்படியே நம்மை தாலாட்டுவதுபோல் உள்ளது. அதில் சில நேரங்கள் அமர்ந்து இருந்தோம். பிறகு அனைத்து விளையாட்டுகளையும் பார்த்து, ரசிக்க வேண்டியவைகளை ரசித்துவிட்டு, உடைகளை மாற்றிகொண்டு, அங்கேயே சாப்பிட்டுவிட்டு வெளியே வந்தோம். உடனடியாக அங்கே இருந்து மலாக்கா செல்வதாக திட்டம். செக் இன் டைம் மதியம் 2. ஆனால் நாங்கள் போய் சேர 4 ஆகலாம். அதனால் ஹோட்டலுக்கு போன் செய்து, நாங்கள் வர லேட்டாகும் என்று சொல்லிவிட்டு, காரை திறப்பதற்கு ரிமோட்டை ஆன் செய்தால், ரிமோட் வேலை செய்யவில்லை. சரி, சாவியை வைத்து திறக்கலாம் என நினைத்து திறந்தால், கீஈ கீஈ என்று கார் அலறுகிறது. ரிமோட்டில் காரை க்ளோஸ் செயததால் ரிமோட்டில்தான் ஆன் செய்ய வேண்டும்.

என்ன செய்வது?

- தொடரும்

7 comments:

நேசமித்ரன் said...

சுவாரஸ்யமாக சொல்லிப் போகிறீர்கள்
இனிய நடையில்

ந்ல்லா இருக்கு !

~~Romeo~~ said...

ஹ்ம்ம் நடத்துங்க நடத்துங்க .. உங்களுடன் நானும் பயணம் செய்தது போல இருக்கு தல .

padma said...

ஹ்ம்ம் இந்த 4 d நானும் பார்த்து இருக்கேன் ...தொடருங்கள்

என். உலகநாதன் said...

//சுவாரஸ்யமாக சொல்லிப் போகிறீர்கள்
இனிய நடையில்

ந்ல்லா இருக்கு !//

வருகைக்கும், கருத்திற்கும் நன்றி தலைவரே!

என். உலகநாதன் said...

//ஹ்ம்ம் நடத்துங்க நடத்துங்க .. உங்களுடன் நானும் பயணம் செய்தது போல இருக்கு தல .//

வருகைக்கு நன்றி ரோமியோ.

என். உலகநாதன் said...

//ஹ்ம்ம் இந்த 4 d நானும் பார்த்து இருக்கேன் ...தொடருங்கள்//

அப்படியா? உங்கள் அனுபவத்தையும் சொல்லுங்கள் பத்மா.

வருகைக்கு நன்றி தோழி.

Anonymous said...

"ஒரு லாக்கர் வாடைக்கு வாங்கி "

appadina enna? sir. Ungal travel thodar arumaiyaga ulladhu. joke, suspense... ellameya ulladhu. congratulations. Super.